ربك بيفرجها

الجملة هاي سمعتها كتير وقربت اكرهها لأن اللي بيدري يدري واللي ما بيدري بيقول كف عدس.

طبعا الناس مش تاركيني في حالي كلهم بيزنوا عليك انك تتزوج بس يا عالم انا مش مفكر في الزيجة هالوقت بيقولولك انت مفكر حالك صغير صار عمرك 28 سنة وبنات الايام هادي ما بيرضوا في الشاب اللي بيوصل 30, طيب يا عالم انا مش مستعد اني اتزوج هلا انتو عارفين قديش بدها تكلفني مصاريف الزواج تقريبا 15000$ بتقدر حضرتك تدايني اياها؟؟؟

طبعا بيقولولك ربنا بيفرجها والعروس بتيجي وبيجي رزقها معها , طيب انا عارف انو ربنا هيرزقني برزقها بس يعني انا بدون شقة وبدي اسكن عند اهلي ولما افكر اني اعمل اشي لنفسي الراتب مش هيكفي اعيش منه ولا احوش؟؟؟

وبعدين الأولاد اذا اجو مصاريفهم بتزيد وبصراحة انا مش ناوي اخلي اولادي يشقوا في الدنيا هادي انا ان ربنا اراد بدي اوفر الهم اللي بدهم اياه وناوي ازوجهم على 18 وبعدين يحلوا عني ويعيشوا حياتهم اللي انا قدرت اعمله الهم عملته.

فيا ريت الناس اللي بتحكي في الوسع يسيبوهم من توريط الناس وبعدين لما تصير المشاكل الله لا يقدر بيعملوا حالهم ما الهم دخل فيا ريت سيبوا الشباب في حالها.